आंदोलनस्थळीच साजरी दीप अमावास्या

धुळे जिल्हा मराठा क्रांती मोर्चातर्फे गेल्या २३ दिवसांपासून जिल्हाधिकारी कार्यालसमोर ठिय्या आंदोलन सुरू आहे. यात विविध आंदोलने करून सरकारचे लक्ष वेधण्याचा प्रयत्न आंदोलकांकडून केला जात आहे. त्यानुसार दि. ११ रोजी रात्री महिलांनी आंदोलस्थळीच दीप अमावास्या साजरी करून सरकारचा निषेध केला. दुसऱ्या दिवशी रविवारी सकाळी आंदोलकांनी जिल्हाधिकारी कार्यालयासमोरच थाळीनाद आंदोलन करून निषेध व्यक्त केला.

मराठा आरक्षणाच्या मागणीसाठी राज्यासह जिल्हाभरात वेगवेगळ्या स्वरुपाची आंदोलने केली जात आहेत. त्यात मराठा आमदारांची प्रतीकात्मक अंत्ययात्रा, दशक्रिया विधी, रेल रोको, रास्ता रोको, ठिय्या, जागरण गोंधळ, घंटानाद आंदोलनांचा समावेश आहे. यात आता या दोघेही आंदोलनांचा समावेश झाला आहे. शनिवारी सायंकाळी जिल्हाधिकारी कार्यालयासमोर ठिय्या आंदोलनस्थळी महिलांनी दीप अमावास्या साजरी केली. या वेळी महिलांनी आपल्या हाताने दिवे पेटवून ‘मराठा समाजाला आरक्षण देण्यासाठी सरकारला सद्बुद्धी दे’ अशी प्रार्थना केली. याप्रसंगी हेमा हेमाडे, किरण नवले, डॉ. सुलभा कुवर, डॉ. उषा साळुंखे, भारती मोरे, अनिता वाघ, मनीषा ठाकूर आदींसह आंदोलक उपस्थित होते. तर रविवारी (दि. १२) सकाळी आंदोलनास्थळी मराठा समाजबांधवांनी थाळीनाद आंदोलन करून सरकारचा निषेध केला. या वेळी राजाराम पाटील, राजू इंगळे, संजय वाल्हे, दीपक रवंदळे, समाधान शेलार, अशोक सुडके, राजू ढवळे, प्रफुल्ल माने, वसंत हराळ, गोविंद वाघ, चंद्रकांत मराठे, वीरेंद्र मोरे आदींसह मराठा समाजबांधव उपस्थित होते.

Be the first to comment

Leave a Reply

Your email address will not be published.


*