नाशिक महानगरपालिका सार्वत्रिक निवडणूक 2025-26 करिता आज सकाळी 07:30 वाजेपासून मतदान प्रक्रियेला प्रारंभ झाला असून सकाळी 7:30 ते 03:30 एकूण 8 तासाची मतदानाची टक्केवारी 39.64% असल्याची माहिती मनपा निवडणूक प्राधिकृत अधिकारी तथा उपायुक्त लक्ष्मीकांत साताळकर यांनी दिली.
नाशिक: नाशिक महानगरपालिका सार्वत्रिक निवडणूक 2025-26 साठी आज सकाळी उत्साहात मतदान प्रक्रियेला सुरुवात झाली. सकाळी 07:30 वाजल्यापासून शहरातील सर्व मतदान केंद्रांवर मतदारांनी रांगा लावत आपला मतदानाचा हक्क बजावण्यास प्रारंभ केला. प्रारंभीच्या तासांमध्ये मतदान केंद्रांवर शांततापूर्ण वातावरण असून प्रशासनाकडून आवश्यक त्या सर्व सोयी-सुविधा उपलब्ध करून देण्यात आल्याचे चित्र दिसून आले.
मनपा निवडणूक प्राधिकृत अधिकारी तथा उपायुक्त लक्ष्मीकांत साताळकर यांनी दिलेल्या माहितीनुसार सकाळी 07:30 ते दुपारी 03:30 या 8 तासांच्या कालावधीत एकूण 39.64 टक्के मतदान झाले आहे. महिला, ज्येष्ठ नागरिक तसेच पहिल्यांदाच मतदान करणाऱ्या तरुण मतदारांचा सहभाग लक्षणीय असल्याचे त्यांनी सांगितले. शहरातील विविध प्रभागांमध्ये मतदानाची टक्केवारी संमिश्र स्वरूपाची असून काही भागांत चांगला प्रतिसाद मिळाल्याचे प्रशासनाकडून स्पष्ट करण्यात आले.
दरम्यान, मतदान प्रक्रिया सुरळीत व पारदर्शक पार पडावी यासाठी कडक पोलीस बंदोबस्त तैनात करण्यात आला आहे. कोणताही अनुचित प्रकार घडू नये यासाठी निवडणूक प्रशासन सतर्क असून दिवसभर परिस्थितीवर बारकाईने लक्ष ठेवण्यात येत आहे. उर्वरित वेळेत मतदानाची टक्केवारी वाढेल, असा विश्वास निवडणूक अधिकाऱ्यांनी व्यक्त केला असून नागरिकांनी मोठ्या संख्येने मतदानात सहभागी व्हावे, असे आवाहनही करण्यात आले आहे.
