एका वृत्तवाहिनीशी बोलताना नितेश राणे यांनी “मुंबईचा महापौर ‘आई लव्ह महादेव’ म्हणणारा हिंदूच असेल” असे विधान केले. “मुंबईचा महापौर खान किंवा पठाण का होऊ शकत नाही?” या प्रश्नावर प्रतिक्रिया देताना राणे यांनी AIMIM वर निशाणा साधला.
मुंबई: मुंबई महानगरपालिका (बीएमसी) निवडणुकांच्या पार्श्वभूमीवर महाराष्ट्रातील राजकीय वातावरण तापले असून, महापौरपदावरून सत्ताधारी आणि विरोधकांमध्ये आरोप-प्रत्यारोप सुरू झाले आहेत. भाजप नेते आणि राज्य सरकारमधील मंत्री नितेश राणे यांच्या वक्तव्यामुळे नव्या वादाला तोंड फुटले आहे.
एका वृत्तवाहिनीशी बोलताना नितेश राणे यांनी “मुंबईचा महापौर ‘आई लव्ह महादेव’ म्हणणारा हिंदूच असेल” असे विधान केले. त्यांनी दावा केला की मुंबईची ओळख हिंदुत्वाशी जोडलेली असून, महापौरपदावर कोणताही ‘खान किंवा पठाण’ येणार नाही. त्यांच्या या वक्तव्यावरून विरोधकांनी तीव्र टीका केली आहे.
हे वक्तव्य हैदराबादचे खासदार आणि AIMIM पक्षाचे नेते असदुद्दीन ओवैसी यांच्या पक्षातील नेते वारिस पठाण यांनी उपस्थित केलेल्या प्रश्नाच्या पार्श्वभूमीवर आले आहे. “मुंबईचा महापौर खान किंवा पठाण का होऊ शकत नाही?” या प्रश्नावर प्रतिक्रिया देताना राणे यांनी AIMIM वर निशाणा साधला.
दरम्यान, आगामी बीएमसी व इतर स्थानिक स्वराज्य संस्थांच्या निवडणुकांसाठी सत्ताधारी महायुतीत भाजप आणि शिवसेना (शिंदे गट) यांच्यात जागावाटपाबाबत चर्चा सुरू आहे. ज्या भागात ज्या पक्षाची ताकद अधिक आहे, त्या भागात त्याच पक्षाने उमेदवार उभा करावा, असा प्राथमिक फॉर्म्युला ठरल्याचे सांगितले जात आहे.
१५ जानेवारी रोजी राज्यातील २९ नगरपालिकांसाठी मतदान होणार असून, १६ जानेवारीला मतमोजणी होईल. मुंबई महानगरपालिकेसाठी एकूण २२७ प्रभाग असून, बीएमसीच्या अंतिम मतदार यादीप्रमाणे १ कोटी ३ लाखांहून अधिक मतदार मतदानासाठी पात्र आहेत. यामध्ये पुरुष, महिला तसेच ‘इतर’ श्रेणीतील मतदारांचा समावेश आहे.
देशातील सर्वात श्रीमंत महापालिका असलेल्या बीएमसीवर पुढील पाच वर्षे कोणाची सत्ता येणार? याकडे संपूर्ण राज्याचे लक्ष लागले असून, सत्ताधारी महायुती आणि विरोधी महाविकास आघाडी यांच्यात मुंबईसह प्रमुख शहरी भागांमध्ये चुरशीची लढत होण्याची शक्यता आहे.
