२००८ रेल्वे भरती प्रकरणात आज सुनावणी; राज ठाकरे म्हणाले “मला गुन्हा मान्य नाही”
ठाणे न्यायालयात आज महाराष्ट्र नवनिर्माण सेनेचे अध्यक्ष राज ठाकरे हजर झाले आणि २००८ च्या रेल्वे भरती प्रकरणातील सुनावणीने पुन्हा एकदा राज्याच्या राजकीय वातावरणात चर्चा रंगली.
ठाणे: २००८ मध्ये कल्याण स्थानकावर मनसे कार्यकर्त्यांनी उत्तर भारतीय उमेदवारांवर केलेल्या हल्ल्यांमुळे झालेल्या मोठ्या गोंधळाची जबाबदारी राज ठाकरे यांच्या खांद्यावर टाकण्यात आली होती. परप्रांतीयांवर लक्ष्य साधल्याचा आणि हिंसाचाराला प्रोत्साहन दिल्याचा आरोप त्यांच्यावर ठेवला गेला होता. त्या काळात निर्माण झालेल्या वातावरणामुळे महाराष्ट्रातील मराठी-अमराठी वाद अधिक तापला होता. याच प्रकरणावर आज ठाणे न्यायालयात सुनावणी होती. या दरम्यान न्यायालयात हजर राहिलेल्या राज ठाकरे यांना न्यायालयाने “गुन्हा मान्य आहे का?” असा थेट सवाल केला असता, त्यांनी ठामपणे “गुन्हा मान्य नाही” असे उत्तर दिल्याने या खटल्याला नवे वळण मिळाले आहे.
आज झालेल्या सुनावणीसाठी ठाणे न्यायालयात राज ठाकरे पोहोचताच, मनसैनिकांची मोठी गर्दी न्यायालय परिसरात जमा झालेली पाहायला मिळाली. कार्यकर्त्यांनी घोषणाबाजी करत त्यांचे स्वागत केले. राज ठाकरे यांच्यावर दाखल असलेल्या २००८ सालच्या रेल्वे भरतीदरम्यान परप्रांतियांना मारहाण केल्या प्रकरणात आजची तारीख महत्वाची ठरली. न्यायाधीशांनी स्पष्टपणे म्हटले की हा खटला एका महिन्यात पूर्ण व्हावा आणि त्यासाठी सर्वांनी सहकार्य करावे. त्यांच्या वकिलांनीही राज ठाकरे पूर्ण सहकार्य करतील असे सांगितले.
या सुनावणीनंतर प्रकरणाची पुढील तारीख अद्याप निश्चित झालेली नसली, तरी न्यायालयात झालेल्या घडामोडींनी मनसे आणि राज्य राजकारणात पुन्हा एकदा या जुन्या खटल्यावर प्रकाशझोत पडला आहे. राज ठाकरे यांनी गुन्हा नाकारल्याने पुढील टप्प्यांमध्ये काय घडते याकडे सर्वांचे लक्ष लागले आहे.
