बांगलादेशातील प्रमुख युवा नेते शरीफ उस्मान हादी यांच्या हत्येनंतर अवघ्या काही दिवसांतच देशात पुन्हा एकदा राजकीय हिंसाचाराची घटना घडली आहे. बांगलादेशच्या नैऋत्य भागातील खुलना शहरात अज्ञात बंदूकधाऱ्यांनी सोमवारी एका विद्यार्थी आंदोलनाशी संबंधित नेत्यावर गोळीबार केला.
ढाका :२००४ मध्ये झालेल्या विद्यार्थ्यांच्या नेतृत्वाखालील आंदोलनातील प्रमुख नेते आणि नॅशनल सिटीझन पार्टी (NCP) चे खुलना विभाग प्रमुख तसेच पक्षाच्या कामगार आघाडीचे केंद्रीय समन्वयक मुहम्मद मोतालेब सिकदर यांच्यावर हल्ला करण्यात आला. या घटनेची माहिती पक्षाच्या संयुक्त प्रमुख समन्वयक महमुदा मिटू यांनी फेसबुक पोस्टद्वारे दिली.
मिटू यांनी सांगितले की, सिकदर यांना गंभीर अवस्थेत खुलना मेडिकल कॉलेज रुग्णालयात दाखल करण्यात आले आहे. कालेऱ कंठा या स्थानिक वृत्तपत्राने रुग्णालयातील सूत्रांच्या हवाल्याने दिलेल्या माहितीनुसार, सिकदर यांच्या डोक्याच्या डाव्या बाजूला गोळी लागली असून रुग्णालयात दाखल करताना मोठ्या प्रमाणात रक्तस्राव होत होता. डॉक्टरांकडून त्यांच्यावर तातडीचे उपचार सुरू आहेत.
ही घटना १२ डिसेंबर रोजी ढाक्यातील बिजॉयनगर भागात शरीफ उस्मान हादी यांची गोळी झाडून हत्या करण्यात आल्यानंतर घडली आहे. हादी हे गेल्या वर्षी झालेल्या विद्यार्थ्यांच्या नेतृत्वाखालील आंदोलनातील प्रमुख नेते होते. या आंदोलनामुळे तत्कालीन पंतप्रधान शेख हसीना यांच्या नेतृत्वाखालील अवामी लीग सरकार सत्तेतून खाली आले होते.
३२ वर्षीय हादी हे इंकिलाब मंचचे प्रवक्ते होते. सिंगापूरमध्ये उपचारादरम्यान त्यांचे निधन झाले होते. ते आगामी १२ फेब्रुवारी रोजी होणाऱ्या सार्वत्रिक निवडणुकीसाठी उमेदवार होते.
हादी यांच्या मृत्यूनंतर ढाका आणि इतर प्रमुख शहरांमध्ये तणाव आणि हिंसाचाराचे वातावरण निर्माण झाले आहे. या पार्श्वभूमीवर मोहम्मद युनूस यांच्या नेतृत्वाखालील अंतरिम सरकारने शनिवारी देशभर शोक पाळला असून, दोषींना शोधून काढण्यासाठी कठोर कारवाई केली जाईल, असे आश्वासन दिले आहे.
