“हिंदू हत्या बंद करा”, “भारत माता की जय” दिल्लीतील बांगलादेश उच्चायोगाबाहेर निदर्शने

विश्व हिंदू परिषद (VHP) आणि बजरंग दलाच्या कार्यकर्त्यांनी बांगलादेशात हिंदूंवरील अत्याचार आणि धार्मिक स्थळांची तोडफोड केल्याचा आरोप करत नवी दिल्लीतील बांगलादेश उच्चायोगाबाहेर जोरदार निदर्शने केली.

नवी दिल्ली: बांगलादेशमध्ये हिंदू युवकाच्या कथित जमावाकडून झालेल्या हत्येच्या निषेधार्थ शुक्रवारी नवी दिल्लीतील बांगलादेश उच्चायोगाबाहेर जोरदार निदर्शने करण्यात आली. विश्व हिंदू परिषद (VHP) आणि बजरंग दलाच्या कार्यकर्त्यांनी बांगलादेशमध्ये हिंदूंवर होत असलेल्या अत्याचारांचा आणि धार्मिक स्थळांची तोडफोड केल्याचा आरोप करत आंदोलन केले.

निदर्शनादरम्यान परिस्थिती तणावपूर्ण बनली. आंदोलकांनी “हिंदू हत्या बंद करा”, “भारत माता की जय” आणि “युनूस सरकार शुद्धीवर या” अशा घोषणा दिल्या. काही आंदोलकांनी सुरक्षा बॅरिकेड्स ढकलल्याने दोन स्तरांवरील बॅरिकेड्सचे नुकसान झाले. यावेळी पोलिस आणि आंदोलकांमध्ये किरकोळ झटापट झाल्याचीही माहिती आहे. काही आंदोलकांना ताब्यात घेण्यात आले होते.

18 डिसेंबरला युवकाची हत्या

मिळालेल्या माहितीनुसार, बांगलादेशच्या मयमनसिंह जिल्ह्यातील बालुका परिसरात 18 डिसेंबर रोजी 25 वर्षीय हिंदू युवक दीपू चंद्र दास याची कथितपणे जमावाकडून मारहाण करून हत्या करण्यात आली. ही घटना कथित ईशनिंदेच्या आरोपाशी संबंधित असल्याचे सांगितले जाते. या प्रकरणी बांगलादेश पोलिसांनी आतापर्यंत 12 जणांना अटक केल्याची माहिती दिली आहे.

कडेकोट सुरक्षा व्यवस्था

निदर्शनांच्या पार्श्वभूमीवर दिल्ली पोलिस आणि अर्धसैनिक दलांना अलर्टवर ठेवण्यात आले होते. उच्चायोगाबाहेर तीन स्तरांची सुरक्षा व्यवस्था तैनात करण्यात आली होती. परिस्थिती नियंत्रणात आणल्यानंतर पोलिसांनी पुन्हा बॅरिकेडिंग केली.

बांगलादेशची प्रतिक्रिया

दरम्यान, भारतातील बांगलादेशी राजनयिक संस्थांच्या सुरक्षेबाबत बांगलादेशने चिंता व्यक्त केली आहे. या संदर्भात भारतीय उच्चायुक्तांना बोलावण्यात आले आहे. बांगलादेशच्या परराष्ट्र मंत्रालयाने राजनयिक परिसरांवरील हिंसा आंतरराष्ट्रीय नियमांचे उल्लंघन असल्याचे म्हटले आहे. भारताने मात्र सुरक्षेत कोणतीही मोठी चूक झाली नसल्याचे स्पष्ट केले आहे.