शिवसेनेने माजी नगरसेवक संजय पांडे यांचे पुत्र सिद्धार्थ पांडे यांना उमेदवारी दिल्याने नाराज झालेल्या नितीन लांडगे यांनी अपक्ष उमेदवारी जाहीर केली आहे. पत्रकार परिषदेत लांडगे यांनी “वार्ड क्रमांक 4 मध्ये सिद्धार्थ पांडे यांनी किंवा त्यांच्या कुटुंबाने केलेलं एकही विकासकाम दाखवता आलं, तर मी तात्काळ निवडणूक लढवणं थांबवेन.” असे थेट आव्हान केले आहे.
ठाणे : ठाणे महानगरपालिका निवडणुकीच्या पार्श्वभूमीवर राजकीय वातावरण चांगलंच तापलं असून, शिवसेना (एकनाथ शिंदे गट) मध्ये अंतर्गत नाराजी उफाळून आली आहे. वार्ड क्रमांक 4 मधून उमेदवारी नाकारण्यात आल्यानंतर युवा सेनेचे माजी पदाधिकारी नितीन लांडगे यांनी बंडखोरी करत अपक्ष उमेदवारी जाहीर केली आहे. यावेळी त्यांनी शिंदे गटाचे अधिकृत उमेदवार सिद्धार्थ पांडे यांना थेट आणि आक्रमक आव्हान दिलं आहे.
पत्रकार परिषदेत बोलताना नितीन लांडगे म्हणाले, “सिद्धार्थ पांडे किंवा त्यांच्या कुटुंबाने वार्ड क्रमांक 4 मध्ये केलेलं एक तरी विकासकाम दाखवावं. जर ते दाखवू शकले, तर मी आजच निवडणूक लढवणं सोडून देईन,” असं आव्हान त्यांनी जाहीरपणे दिलं.
१५ जानेवारी रोजी होणाऱ्या ठाणे महानगरपालिका निवडणुकीसाठी शिवसेनेकडून तिकीट न मिळाल्यामुळे लांडगे प्रचंड नाराज झाले होते. त्यानंतर त्यांनी मागील आठवड्यात युवा सेनेच्या कोअर कमिटी सदस्यत्वाचा राजीनामा दिला आणि स्वतंत्र उमेदवार म्हणून निवडणुकीच्या रिंगणात उतरण्याचा निर्णय घेतला.
शिवसेनेने माजी नगरसेवक संजय पांडे यांचे पुत्र सिद्धार्थ पांडे यांना उमेदवारी दिल्याने लांडगे नाराज झाले. रविवारी घेतलेल्या पत्रकार परिषदेत लांडगे यांनी तिकीट मिळवण्यासाठी दबाव आणल्याचा आरोप करत, पात्रता आणि जमीनीवर काम करणाऱ्या कार्यकर्त्यांकडे दुर्लक्ष झाल्याचं सांगितलं.
तसेच, “माझी लढाई शिवसेना किंवा उपमुख्यमंत्री एकनाथ शिंदे यांच्याविरोधात नाही, तर लादलेल्या उमेदवाराविरोधात आहे. ज्यांना मी आजही गुरु मानतो,” असंही त्यांनी स्पष्ट केलं.
नारळ चिन्हावर काय म्हणाले लांडगे?
नितीन लांडगे यांनी गेल्या अनेक वर्षांपासून परिसरातील युवक आणि नागरिकांसाठी केलेल्या कामांचा दावा केला. त्यांना मिळालेलं नारळ हे निवडणूक चिन्ह शुभ असल्याचं सांगत ते म्हणाले की, “प्रत्येक राजकीय प्रवासाची सुरुवात नारळ फोडूनच होते.”
संजय पांडे हे पूर्वी भाजपचे नेते होते. त्यांनी २०१४ मध्ये ओवळा–माजिवाडा मतदारसंघातून निवडणूक लढवली होती. २०१६ मध्ये त्यांनी शिवसेनेत प्रवेश केला आणि २०२२ मधील पक्षफुटीनंतर ते शिंदे गटात सहभागी झाले.
