देशातील सर्वात वादग्रस्त कफ सिरप तस्करी प्रकरणावर प्रवर्तन निदेशालय (ED)ने आज शुक्रवारी सकाळी मोठी कारवाई करत उत्तर प्रदेश, झारखंड आणि गुजरातमध्ये एकूण २५ ठिकाणी छापेमारी केली. या रॅकेटचा मुख्य सूत्रधार मानला जाणारा शुभम जयस्वाल फरार असून तो दुबईत असल्याची माहिती मिळत आहे.
नवी दिल्ली: उत्तर प्रदेशातील लखनऊ, जौनपूर, वाराणसी आणि सहारनपूर, झारखंडमधील रांची तसेच गुजरातमधील अहमदाबाद येथे कफ सिरप तस्करी प्रकरणात ईडीने धाड टाकली आहे. या कारवाईत मुख्य आरोपी शुभम जयस्वाल, त्याचे सहकारी आलोक सिंग आणि अमित सिंग यांच्यासह कफ सिरप पुरवणाऱ्या अन्य उत्पादक कंपन्यांवर, तसेच चार्टर्ड अकाउंटंट विष्णू अग्रवाल यांच्याशी संबंधित ठिकाणांवर तपास करण्यात आला. गेल्या दोन महिन्यांत उत्तर प्रदेशातील अनेक जिल्ह्यांत कोडीन-आधारित कफ सिरपच्या बेकायदेशीर साठवण, वाहतूक आणि तस्करी संदर्भात ३० पेक्षा अधिक गुन्हे दाखल झाले होते. या एफआयआरच्या आधारेच ईडीने ईसीआयआर नोंदवत तपासाची सूत्रे हाती घेतली.
या रॅकेटमधून निर्माण झालेला गुन्हेगारी उत्पन्नाचा आकडा हजारो कोटींवर गेल्याचा अंदाज तपास यंत्रणांनी व्यक्त केला आहे. मुख्य आरोपी शुभम जयस्वाल दुबईतून संपूर्ण रॅकेटचा कारभार पाहत असल्याची शक्यता जोर धरत आहे. त्याचे वडील भोला प्रसाद यांना पोलिसांनी आधीच अटक केली असून, आतापर्यंत एकूण ३२ जणांना उत्तर प्रदेश पोलिसांनी ताब्यात घेतले आहे.
हे रॅकेट सक्षम करण्यासाठी आरोपींनी बनावट कंपन्या आणि खोटे पत्ते वापरून एक संपूर्ण फसवे जाळे तयार केले होते. या कंपन्यांचा वापर करून मोठ्या प्रमाणावर कोडीनयुक्त कफ सिरप काळ्या बाजारात पुरवले जात असल्याचे तपासात उघड झाले आहे. या गंभीर गुन्ह्याच्या तपासासाठी उत्तर प्रदेश सरकारने विशेष तपास पथक (SIT) स्थापन केले असून, जयस्वालला युएईमधून परत आणण्यासाठी प्रत्यार्पण प्रक्रियाही सुरू केली आहे.
अलीकडेच यूपी पोलिसांनी मुख्य आरोपी जयस्वाल आणि त्याचा साथीदार महेश सिंग — दोघेही फरार — यांच्या माहितीसाठी प्रत्येकी २५,००० रुपयांचे बक्षीस जाहीर केले होते. दरम्यान, जयस्वालने स्वतःला निर्दोष असल्याचा दावा करणारा एक व्हिडिओ जारी केला असला, तरी त्याची सत्यता पोलिसांकडून तपासली जात आहे.
ईडीच्या कारवाईमुळे या बहु-राज्य कफ सिरप तस्करी रॅकेटमागील मोठे आर्थिक आणि राजकीय गुऱ्हाळ उघडकीस येण्याची शक्यता असून, पुढील काही दिवसांत तपासात मोठी प्रगती अपेक्षित आहे.
