भारताची अनुभवी डिस्कस थ्रोअर सीमा अंतिल पूनिया डोपिंग चाचणीत पॉझिटिव्ह आढळल्याने १६ महिन्यांसाठी निलंबित करण्यात आली आहे. राष्ट्रीय डोपिंग प्रतिबंधक संस्था (NADA) ने जारी केलेल्या ताज्या यादीत ही माहिती देण्यात आली.
नवी दिल्ली: निलंबन १० नोव्हेंबरपासून लागू झाले असून, कोणत्या पदार्थासाठी ती पॉझिटिव्ह आढळली याची माहिती नाडाने उघड केलेली नाही.
सीमा पूनिया यांच्यासाठी हा डोपिंगचा तिसरा प्रकार आहे. वयाच्या १७व्या वर्षी, २००० मध्ये विश्व ज्युनियर स्पर्धेत उत्तम कामगिरी करत सुवर्णपदक जिंकल्यानंतर लगेचच प्स्यूडोएफेड्रीन या प्रतिबंधित पदार्थासाठी ती दोषी ठरली होती आणि त्यामुळे तिचे सुवर्णपदक काढून घेतले गेले होते. त्यावेळच्या नियमांनुसार, एएफआयने तिला या गुन्ह्यासाठी फटकारले. २००२ मध्ये वर्ल्ड ज्युनियर्सच्या पुढील आवृत्तीत सीमाने कांस्यपदक जिंकले. हरियाणाच्या या डिस्कस थ्रोअरने २०१४ मध्ये आशियाई खेळांमध्ये ६१.०३ मीटरच्या प्रयत्नाने सुवर्णपदक जिंकले, यापूर्वी २००२ मध्ये कांस्यपदक जिंकले होते. आणि २०१८ आणि २०२३ मध्ये पुन्हा कांस्यपदक जिंकले.
केवळ सीमा पुनियाच नव्हे, तर आणखीन काही भारतीय अ‍ॅथलिटसदेखील डोपिंग प्रकरणात दोषी आढळले आहेत. लांब पल्ल्याची धावपटू पूजा यादव (चार वर्षे), गोळाफेकपटू मनजीत कुमार (सहा वर्षे) आणि मध्यम पल्ल्याच्या धावपटू निकेश धनराज राठोड (चार वर्षे) यांनाही डोप चाचणीत अपयशी ठरल्याबद्दल निलंबित करण्यात आले. मॅरेथॉन धावपटू कुलदीप सिंग आणि महिला स्टीपलचेस धावपटू छवी यादव यांनाही चार वर्षांसाठी निलंबित करण्यात आले आहे.
